Вохӯрӣ бо сокинони Ҷамоати деҳоти Понғози ноҳияи Ашт
Бахши Хадамоти муҳоҷират дар якҷояги бо шуъбаи Агентии меҳнат, шуғли аҳолӣ ва намояндаи КДАМ ҶТ дар ноҳияи Ашт вохӯриро бо сокинони Ҷамоати деҳоти Понғоз ба роҳ монданд.
Дар чорабинии мазкур оид ба пешгирии шомилшавии ҷавонон ба ҳизбу ҳаракатҳои ифротӣ, савдои одамон ва ҷалби ҷавонон ба касбомӯзонӣ, инчунин муҳтавои Паёми Президенти Ҷумҳурии Тоҷикистон ироа гардид.
Мудири бахши Хадамоти муҳоҷират дар ноҳияи Ашт Назарова Сулҳия дар баромади худ оид ба савдои одамон, зуҳуроти хавфнок будани самти мазкур сухан гуфт. Ӯ қайд кард, ки муборизаро ба муқобили ин падидаи ногузир, давлатҳо дар доираи санадҳои меъёрии байналмилалӣ ва миллӣ ба роҳ мондаанд. Қабули Қонуни Ҷумҳурии Тоҷикистон «Дар бораи муқовимат ба савдои одамон ва кумак ба қурбониёни савдои одамон» ба ин мақсад мебошад.
Аз ҷумла, қайд гардид, ки мақсад ва вазифаҳои қонуни мазкур аз чӣ иборат аст ва аз қонуни қаблӣ чӣ фарқият дорад?
Савдои одамон яке аз зуҳуроти хавфноки иҷтимоии фаромарзӣ (трансмиллӣ) буда, дар миқёси ҷаҳон ҳамчун ҷинояти вазнин ва поймолкунандаи ҳуқуқу озодиҳои инсон, ки айни ҳол дар худ унсурҳои таҳдид ба амнияти миллӣ ва халалдор намудани суботи иҷтимоию иқтисодии давлатҳоро ниҳон дорад, эътироф гардидааст.
Дар фарҷоми вохӯрӣ иштирокчиён ба саволҳои додаи худ посухҳои қаноатбахш гирифтанд.
Бахши Хадамоти муҳоҷират дар ноҳияи Ашт
